Një lojë e fundit në kazino përpara se të mbyllte sytë përgjithmonë. Kjo ishte dëshira e fundit e Hans Zandbergen, 69 vjeç, i cili vuante nga kanceri në fazë terminale në mushkëri, që e kishte lënë në gjendje shumë të rëndë shëndetësore. Ai e dinte se i kishin mbetur edhe pak ditë jetë.

Prandaj, kur iu dha mundësia të shprehte dëshirën e tij të fundit, nuk pati asnjë dyshim: dëshironte të rikthehej në kazinonë e tij të preferuar në Roterdam të Holandës, ku dikur shkonte për të luajtur së bashku me bashkëshorten e tij, e cila kishte ndërruar jetë prej kohësh.

Dëshira e tij u bë realitet falë organizatës holandeze “Stichting Ambulance Wens” (Fondacioni Ambulanca e Dëshirave), një organizatë vullnetare e njohur në të gjithë vendin për misionin e saj të veçantë: përmbushjen e dëshirave të fundit të pacientëve në fazë terminale, të cilët nuk janë më në gjendje të kujdesen vetë për veten.

Vullnetarët përgatitën një ambulancë të posaçme dhe, duke marrë të gjitha masat e nevojshme mjekësore, e transportuan Hansin deri në hyrjen e kazinosë. Aty nuk e prisnin vetëm punonjësit e institucionit, por edhe vajzat e tij dhe të afërmit më të ngushtë, të cilët kishin vendosur ta kthenin një moment të mbushur me trishtim në një festë të vogël familjare.

Pasi hyri në kazino, Hans u vendos në një barelë të posaçme, përballë makinës së tij të preferuar të bingove. Për dy orë me radhë, mes habisë dhe emocioneve të klientëve të tjerë, 69-vjeçari luajti dhe buzëqeshi, i rrethuar nga dashuria e familjarëve të tij.

Mbrëmja vijoi me një darkë me gatime peshku në restorantin e kazinosë, një tjetër dëshirë që Hans kishte kërkuar ta realizonte përpara se të ndërronte jetë. Në fund të mbrëmjes, me ironinë e hollë që e kishte karakterizuar gjithmonë, Hans u kthye nga vajzat e tij dhe komentoi rezultatin e lojës: “Arrita ta mbyll pa humbje dhe pa fitim. Dhe kjo do të thotë të fitosh me të vërtetë”.