Kryeministri Edi Rama ka rivendosur ditën e sotme karriget simbolike me mbishkrimin “Dialog” në shkallët e godinës së Kryeministrisë, duke i ftuar sërish protestuesit dhe studentët të ulen në tryezën e bisedimeve.

Përmes një deklarate publike, kreu i qeverisë nëvizoi se e drejta e protestës është e garantuar, por dënoi ashpër përdorimin e dhunës dhe dëmtimin e pronës publike e private gjatë ditëve të fundit.

Lidhur me thirrjen e përsëritur për komunikim dhe qëndrimin e qeverisë, Rama u shpreh:

“Ka një mijë e një pakënaqësi, një mijë e një halle, një mijë e një probleme, mund të ketë edhe 1001 arsye për të protestuar, por asnjë arsye nuk e justifikon dhunën. Çdo arsye është një argument më shumë për dialogun mes njerëzve që ndajnë të njëjtin atdhe, mes njerëzish që ndajnë një atdhe, që kanë të njëjtën shtëpi të përbashkët, mes njerëzish që duan të njëjtën gjë në fund, si ta bëjnë Shqipërinë më të mirë. E drejta e protestës është e pamohueshme, dhuna është krim i ndëshkueshëm. Dje dialogu mori përgjigjen e dhunës. Sot dialogu është këtu përsëri. Dora ime është e shtrirë për këdo që mendon ndryshe nga unë dhe që mendon ndryshe nga shumica e terrorizuar nën trysninë e dhunës. Kush dëmton pronën e përbashkët dhe pasurinë e tjetrit do të paguajë.”

Rivendosja e karrigeve vjen në ditën e nëntë të manifestimeve në kryeqytet, ndërsa qeveria paralajmëron përgjigje ligjore dhe financiare ndaj çdo akti të dhunshëm apo dëmtimi material gjatë tubimeve.