Komisioneri i Lartë i OKB-së për të Drejtat e Njeriut, Volker Turk, ka shprehur shqetësime serioze lidhur me zhvillimin e shpejtë të inteligjencës artificiale, duke paralajmëruar se kjo teknologji mund të arrijë një nivel fuqie të tillë që të rrezikojë vetë ekzistencën e njerëzimit. Turk e bëri këtë deklaratë gjatë një fjalimi në Këshillin e OKB-së për të Drejtat e Njeriut në Gjenevë, pak para fillimit të mandatit të tij të dytë.

Komisioneri theksoi nevojën urgjente për vendosjen e masave mbrojtëse të forta në fushën e sigurisë së inteligjencës artificiale, duke bërë thirrje për një bashkëpunim ndërkombëtar të gjerë. Ai shprehu gjithashtu shqetësim për faktin se një numër shumë i vogël individësh gëzojnë aktualisht një pushtet thuajse të pakufizuar mbi këtë teknologji, pa i përmendur drejtpërdrejt emrat e kompanive të përfshira.

Ndër kompanitë më të rëndësishme të sektorit renditen Meta, OpenAI, Anthropic dhe Google. Sipas Turkut, është e domosdoshme që vendet që strehojnë platformat e inteligjencës artificiale dhe ato të lidhura me zinxhirët e furnizimit të dakordësohen mbi kufij të qartë dhe të respektojnë kufijtë e përbashkët të vendosur kolektivisht.

Foto: Igor Omilaev / Unsplash