Në rrugët e Tiranës, mes kullave moderne dhe hoteleve luksoze, lëvizja e njohur si “Revolucioni i Flamingove” vazhdon të fitojë vrull. Në zemër të kësaj proteste qëndron projekti i Jared Kushnerit, dhëndrit të presidentit amerikan Donald Trump, i cili parashikon ndërtimin e një resorti luksoz në ishullin e Sazanit dhe zonën e Nartës, pranë Zvërnecit, me një investim që pritet të kalojë shifrën e një miliard eurove.

Kundërshtimi i aktivistëve nuk kufizohet vetëm në shqetësimet mjedisore, edhe pse Laguna e Nartës, habitat i rëndësishëm për flamingot dhe shpendë të tjerë, mbrohet nga legjislacioni ndërkombëtar. Protestuesit ngrenë gjithashtu çështje të pronësisë së tokës, transparencës dhe vendimmarrjes për projektet e mëdha. Ndryshimet ligjore të miratuara nga Kuvendi në fillim të vitit 2025, të cilat hapën rrugën për investime edhe në zona të mbrojtura, nxitën reagime të ashpra nga organizatat mjedisore.

Aktivistja Sidorela Vatnikaj thekson se lëvizja nuk është kundër investimeve të huaja, por kundër mungesës së transparencës dhe shkeljes së rregullave. Edhe shqiptarë të diasporës i janë bashkuar protestave, duke ngritur pyetje rreth modelit të zhvillimit që po ndërtohet dhe se kush përfiton realisht prej tij.

Foto: Alex Radelich / Unsplash