Pas pushimeve verore, deputetët i rikthehen punës parlamentare duke nisur sesionin e tretë të legjislaturës së 11-të. Seanca e parë plenare është planifikuar për orën 17:00 dhe pritet të ketë karakter kryesisht ceremonial. Paraprakisht, në orën 11:00, Konferenca e Kryetarëve do të mblidhet për të diskutuar dhe miratuar programin e punës si dhe kalendarin e punimeve për periudhën e re parlamentare.

Dy reforma do të zënë vendin qendror të debatit politik gjatë këtij sesioni: reforma zgjedhore dhe ajo administrative-territoriale. Lidhur me reformën territoriale, Partia Socialiste ka paraqitur një propozim që parashikon reduktimin e numrit të bashkive nga 61 në 46. Nisma ka nxitur kundërshtime të forta, sidomos nga bashkitë që parashikohen të bashkohen me njësi të tjera vendore.

Ndërkohë, para ndërtesës së Kuvendit pritet të mblidhen protestues, ndaj policia parashikohet të vendosë masa sigurie me gardhe policore, sikurse ka ndodhur edhe në raste të mëparshme. Disa prej organizatorëve të protestës kanë bërë thirrje për t’i pritur deputetët me vezë dhe domate gjatë mbërritjes së tyre në parlament.

Foto: Neon Wang / Unsplash