Qeveria shqiptare miratoi sot një paketë ndryshimesh në ligjin që rregullon administrimin e ndërtimeve të konfiskuara, duke synuar krijimin e një modeli të unifikuar dhe më efektiv të menaxhimit të këtyre pronave.

Ndryshimet parashikojnë krijimin e një fondi të posaçëm financiar, i dedikuar ekskluzivisht për ndërtimet pa leje të konfiskuara, i cili do të përdoret për përfundimin e punimeve të lëna pezull. Agjencia e Administrimit të Pasurive të Sekuestruara dhe të Konfiskuara, e njohur si AAPSK, do të jetë institucioni kryesor përgjegjës për zbatimin e këtij procesi.

Një nga risitë më të rëndësishme të draftit lidhet me njohjen e të drejtave të blerësve që kanë lidhur kontrata noteriale me zhvilluesit para konfiskimit, si dhe me pronarët e truallit, të cilët do të kenë të drejtë të përfitojnë njësitë që u takojnë sipas marrëveshjeve të mëparshme.

Projektligji parashikon gjithashtu mundësinë e legalizimit të objekteve me shkelje të lejes së ndërtimit, ku punimet strukturore janë përfunduar dhe njësi individuale posedohen nga persona të tretë me kontrata të vlefshme noteriale.

Për ndërtimet e papërfunduara, subjektet zhvilluese do të mbajnë përgjegjësi financiare, ndërsa në rast moszbatimi parashikohet bllokimi i llogarive bankare dhe aseteve të tyre.

Foto: Sasun Bughdaryan / Unsplash