Gjykata e Lartë i ka kërkuar Ministrisë së Financave të zhbllokojë menjëherë pagesat e gjyqtarëve, të cilat janë pezulluar në sistemin e thesarit për shkak të mosmarrëveshjeve mbi zbatimin e vendimit nr. 15, datë 17 shkurt 2026, të Gjykatës Kushtetuese. Në shkresën drejtuar ministrit Petrit Malaj, kryetari Sokol Sadushi argumenton se as mungesa e një ligji të ri nga Kuvendi, as mungesa e fondeve buxhetore nuk mund të justifikojnë moszbatimin e një vendimi kushtetues.

Sipas Gjykatës së Lartë, Kuvendi kishte afat deri më 31 korrik 2026 për të miratuar ndryshimet ligjore të nevojshme. Duke qenë se ky detyrim nuk u përmbush, formula e mëparshme e pagave të magjistratëve nuk mund të vazhdojë të prodhojë efekte juridike. Paga referuese bazë, e llogaritur nga 1 gushti 2026, arrin në 236.425 lekë, duke përfshirë pagën për pozicion dhe shtesën e kualifikimit. Gjykata kërkon gjithashtu alokimin e fondeve të nevojshme dhe rregullimin e diferencave financiare për periudhën 1 prill 2023 – 31 korrik 2026. “Respektimi i vendimit të Gjykatës Kushtetuese nuk është çështje vullneti institucional, por detyrim kushtetues për çdo organ të Republikës”, thuhet në shkresë.

Foto: Bradley Andrews / Unsplash