Korrupsioni vazhdon të jetë pengesa kryesore që frenon reformat ekonomike dhe sociale në Shqipëri, ndërsa mungesa e fuqisë punëtore të kualifikuar shtohet si shqetësim i rëndësishëm për sektorin privat. Këto rezultojnë ndër gjetjet qendrore të një sondazhi të fundit të Bankës Botërore, në të cilin morën pjesë 219 përfaqësues të institucioneve, biznesit dhe shoqërisë civile.

Sipas të dhënave, 56% e të anketuarve e identifikojnë korrupsionin si faktorin kryesor që pengon ose ngadalëson reformat, ndërsa kapaciteti i pamjaftueshëm qeveritar dhe mungesa e llogaridhënies renditen në vendet e dyta dhe të treta. Për sektorin privat, korrupsioni dhe mungesa e punëtorëve të kualifikuar ndajnë të njëjtën peshë, duke u përmendur nga 52% e të pyeturve.

Lidhur me prioritetet e zhvillimit, bujqësia dhe siguria ushqimore zënë vendin e parë me 49%, të ndjekura nga arsimi me 47%. Turizmi konsiderohet sektori me potencialin më të lartë për krijimin e vendeve të reja të punës, por ekspertët nënvizojnë nevojën e diversifikimit përtej modelit sezonor. Të anketuarit kërkojnë që Banka Botërore të përqendrohet më shumë te zbatimi i reformave dhe te rezultatet konkrete e të matshme, duke evidentuar se hendeku kryesor qëndron jo te hartimi i politikave, por te transformimi i tyre në realitet.

Foto: Adeolu Eletu / Unsplash