Spanja ka regjistruar këtë verë numrin më të lartë të vdekjeve të lidhura me të nxehtin që prej vitit 2015, kur filloi mbledhja sistematike e këtyre të dhënave. Sipas Institutit Shëndetësor Carlos III, gjatë periudhës qershor-gusht 2026 humbën jetën 5.111 persona si pasojë e temperaturave të larta, duke tejkaluar rekordin e mëparshëm të vitit 2022, kur u regjistruan 4.652 vdekje gjatë së njëjtës periudhë.

Nga kjo shifër, 937 vdekje u shënuan në qershor, 2.025 në korrik dhe 2.149 në gusht. Të dhënat mblidhen përmes sistemit MoMo, i cili monitoron ditë pas dite vdekshmërinë dhe e krahason atë me pritshmëritë historike, duke marrë parasysh edhe temperaturat e raportuara nga shërbimi meteorologjik Aemet.

Vendi ka përjetuar këtë vit një verë jashtëzakonisht të nxehtë, me disa valë të njëpasnjëshme temperaturash ekstreme. Korriku 2026 shënoi njërin prej muajve më të nxehtë të regjistruar ndonjëherë në Spanjë dhe u cilësua gjithashtu si korriku më i thatë që nga viti 1961. Aemet ka paralajmëruar se edhe shtatori mund të fillojë me temperatura deri në 10 gradë mbi normalen. Ekspertët e klimës e lidhin intensifikimin e këtyre dukurive me ndryshimet klimatike globale.

Foto: Immo Wegmann / Unsplash