Nga e hëna, mbi 1,600 produkte bazë konsumi në Greqi po shiten me çmime më të ulëta, si rezultat i një marrëveshjeje të arritur ndërmjet qeverisë greke, industrisë, furnitorëve dhe zinxhirëve kryesorë të supermarketeve. Nisma synon të lehtësojë barrën financiare që kostoja e lartë e jetesës vazhdon të ushtrojë mbi familjet greke.

Ulja mesatare e çmimeve është rreth 7%, me reduktime që variojnë nga 5% deri në 7% për shumicën e produkteve, ndërsa për artikuj të caktuar zbritjet arrijnë deri në 20-30%. Pjesëmarrja e kompanive është vullnetare, kurse prodhuesit dhe furnitorët kanë paraqitur propozime konkrete sipas çdo kodi produkti. Kushti minimal i vendosur ishte ulje prej të paktën 5%, e vlefshme për një periudhë nga dy deri në katër muaj.

Lista përfshin rreth 30 kategori, duke përfshirë ushqime bazë si mish, qumësht, vezë, bukë dhe vaj, si dhe detergjentë, produkte higjienik dhe artikuj shkollorë. Mbi 90 kompani furnizuese, 12 zinxhirë supermarketesh dhe tre zinxhirë artikujsh shkollorë i janë bashkuar skemës.

Produktet e përfshira do të jenë të shënuara në raft, ndërsa platforma shtetërore “PosoKanei” mundëson krahasimin e çmimeve dhe ndjekjen e historikut të tyre mes supermarketeve të ndryshme.

Foto: Jack Lee / Unsplash