Allison Guerriero, ish-e dashura e Charles McGonigal – ish-drejtuesit të kundërzbulimit të FBI-së në Nju-Jork – është gjetur e vdekur, sipas raportimeve të Daily Mail. Guerriero kishte qenë një ndër burimet kryesore që denoncoi aktivitetet e paligjshme të ish-zyrtarit të lartë amerikan pranë autoriteteve të SHBA-së.

Lajmi i vdekjes së saj ka risjellë në fokus çështjen McGonigal, i cili u dënua për shkelje të sanksioneve ndaj Rusisë dhe fshehje të pagesave të marra nga një ish-agjent i inteligjencës shqiptare. Rasti kishte tërhequr vëmendje të gjerë edhe në Shqipëri, për shkak të lidhjeve të pretenduara të McGonigal me kryeministrin Edi Rama.

Guerriero kishte deklaruar publikisht se ish-i dashuri i saj i kishte treguar për udhëtime të planifikuara drejt Shqipërisë për t’u takuar me Ramën, pa i saktësuar natyrën e atyre takimeve. Ajo kishte shtuar gjithashtu se McGonigal fliste shpesh për kryeministrin shqiptar dhe se mes tyre ekzistonte një marrëdhënie personale. Dëshmitë e saj fituan peshë të konsiderueshme juridike pasi aktakuza zyrtare e drejtësisë amerikane përmendi emrin e Ramës në disa pika të dokumentit.

Foto: Krzysztof Hepner / Unsplash