Dritan Goxhaj lexoi në protestë një komunikatë të përbashkët, duke bërë një bilanc të 90 ditëve të lëvizjes qytetare që ka mbajtur gjallë sheshin, me kërkesën qendrore për largimin e qeverisë dhe dorëheqjen e kryeministrit Edi Rama.

Sipas tij, në tre muaj protesta arriti të bëjë atë që nuk u realizua në 36 vite, duke u bërë temë debati ndërkombëtar, duke zënë titujt e mediave prestigjioze botërore dhe duke u ngritur si çështje në Parlamentin Evropian dhe Senatin amerikan.

Goxhaj theksoi se lëvizja ka qëndruar e bashkuar përballë trysnive të regjimit, të cilat sipas tij përfshinin dhunë policore, linçim publik dhe përpjekje për ta përçarë. Ai vuri në dukje se protesta nuk ka pronar dhe nuk synon të ngrejë asnjë individ mbi të tjerët, duke e paraqitur këtë si forcën e saj kryesore.

“Nuk jemi këtu për ambiciet e dikujt apo të hapim parti të re, por të shkërmoqum sistemin. Nuk duam rrotacion, por ndryshim të vërtetë”, deklaroi ai, duke nënvizuar se lëvizja bashkon qytetarë të profileve të ndryshme politike, fetare dhe gjeografike, të cilët ndajnë të njëjtin qëllim.

Foto: Alex Radelich / Unsplash