Mesfushori shqiptar Kristjan Asllani ka zyrtarizuar transferimin e tij tek Al Jazira, klubi i njohur i Abu Dhabit, që merr pjesë në kampionatin e Emirateve të Bashkuara Arabe. Marrëveshja është strukturuar si huazim nga Interi italian, me një klauzolë që parashikon blerjen e detyrueshme të kartonit të lojtarit, nëse plotësohen kritere të caktuara.

Konkretisht, nëse Asllani arrin të akumulojë 20 paraqitje gjatë sezonit aktual, Al Jazira do të jetë e detyruar të aktivizojë opsionin e blerjes. Klubi i Emirateve ka investuar 1,5 milionë euro për huazimin, ndërsa blerja e plotë e lojtarit do të kërkojë edhe 5 milionë euro shtesë.

Sezoni i ri në kampionatin vendas sapo ka nisur dhe Al Jazira shfaqet në formë të mirë, pasi ka siguruar fitore në të dyja ndeshjet e para të disputuara. Asllani i shtohet kështu një grupi lojtarësh shqiptarë që zhvillojnë karrierën e tyre në rajonin e Lindjes së Mesme. Kujtojmë se në të njëjtën zonë gjeografike aktivizohen edhe kombëtarë të tjerë si Berat Gjimshiti, Nedim Bajrami dhe Jasir Asani.

Foto: Franco Monsalvo / Pexels