Gjatë vitit të kaluar, vlera neto e aseteve të fondeve të pensionit privat në Shqipëri arriti në 15.05 miliardë lekë, ose rreth 155 milionë euro, duke shënuar një rritje prej 17% në terma vjetorë. Duke lënë jashtë llogaritjes fondet e mbyllura të pensionit, ato të hapurat rezultuan me asete neto prej rreth 9.86 miliardë lekësh, me një rritje vjetore prej 21.7%.

Numri i anëtarëve të regjistruar në këto fonde arriti në 49 899, duke u shtuar me rreth 5 mijë persona gjatë vitit 2025. Megjithatë, kursimi mesatar mbetet modest: çdo kontribuues zotëronte mesatarisht rreth 200 mijë lekë, ose afërsisht 2 070 euro, në llogarinë e tij të pensionit.

Ligji aktual ofron incentiva fiskale duke përjashtuar nga tatimi mbi të ardhurat kontributet deri në një kufi mujor të lidhur me pagën minimale, e cila aktualisht është 50 mijë lekë. Kthimi vjetor që ofrojnë këto fonde luhatet midis 4% dhe 5%, me diferenca të vogla mes tyre, pasi investimet përqendrohen kryesisht në obligacionet afatgjata të qeverisë shqiptare. Tarifat e administrimit mbeten faktori kryesor që ndikon në diferencat e kthimit, me fondet e shitura nëpërmjet kanaleve dixhitale që shfaqin performancë relativisht më të favorshme.

Foto: micheile henderson / Unsplash