Gjatë protestës së 91-të, tribunën e zuri një qytetar i moshuar, i cili u drejtua me fjalë të forta ndaj kryeministrit Edi Rama dhe qeverisë së tij. Para turmës së protestuesve, ai akuzoi kreun e qeverisë se i shpërfill vazhdimisht kërkesat e qytetarëve dhe kërkoi hapur dorëheqjen e tij, duke shtuar se ata që kanë keqpërdorur detyrën duhet të përballen me drejtësinë. “Rama nuk reagon dhe i injoron kërkesat tona. Ne i duam hajdutët në burg, ai i liron. Shqipëria nuk është e Ramës dhe Berishës, por e djemve dhe vajzave tona”, u shpreh ai me zë të lartë. I moshuari u ndal gjithashtu tek nevoja për t’u hapur hapësirë brezave të rinj dhe kërkoi hetimin e ish-zëvendëskryeministres Belinda Balluku, së bashku me persona të tjerë që ai i konsideroi bashkëpunëtorë. Një vend të veçantë në fjalimin e tij zunë pensionistët dhe personat me aftësi të kufizuara, duke iu drejtuar drejtpërdrejt kryeministrit: “Ruhu nga mallkimi i pensionistëve që nuk kanë para për t’u kuruar dhe për të jetuar. Bëj diçka për invalidët”. Ai e mbyll ndërhyrjen e tij duke prekur edhe çështjen e Çamërisë, si dhe nevojën për të sfiduar patronazhistët.

Foto: Joaquin Arenas / Unsplash