Të dhënat e fundit të Eurostat tregojnë se Shqipëria renditet ndër vendet europiane me nivelin më të ulët të konsumit kulturor dixhital. Vetëm 49.91% e përdoruesve shqiptarë të internetit shikonin televizion ose video online në vitin 2024, krahasuar me mesataren e Bashkimit Europian prej 78.75%. Brenda Europës, vetëm Rumania kishte një nivel më të ulët, me 43.99%, ndërsa vende si Holanda dhe Finlanda i afroheshin 96%. Hendeku me vendet e Ballkanit Perëndimor është gjithashtu i dukshëm: Mali i Zi regjistron 81.92% dhe Kosova 80.02%.

Diferenca ngushtohet disi në rastin e leximit të lajmeve online. Në vitin 2025, 73.27% e përdoruesve shqiptarë lexonin media dixhitale, pak mbi mesataren e BE-së prej 70.81%, megjithëse vendet e rajonit si Serbia dhe Mali i Zi qëndrojnë dukshëm më lart.

Për dëgjimin e muzikës në internet, Shqipëria shënon 54.26% kundrejt 64.97% sa është mesatarja europiane, ndërsa për lojërat dixhitale diferenca me BE-në është më e vogël, 28.05% krahasuar me 33.70%. Këto të dhëna bazohen në anketën vjetore të Eurostat dhe përfshijnë personat e moshës 16 deri në 74 vjeç.

Foto: Amin Zabardast / Unsplash