Norvegjia po merr masa për të kufizuar përdorimin e syzeve inteligjente dhe pajisjeve të ngjashme, në përgjigje të shqetësimeve gjithnjë e në rritje mbi mbrojtjen e privatësisë. Ministria e Digjitalizimit njoftoi se po kërkon një kuadër rregullator më të rreptë për këtë teknologji dhe u bëri thirrje institucioneve publike e kompanive private të hartojnë udhëzime të qarta për përdorimin e saj.

“Privatësia dhe mbrojtja e të dhënave po vihen nën presion nga teknologjitë e reja. Për këtë arsye, do të rregullohen syzet inteligjente dhe pajisjet e ngjashme me standarde më të larta se ato aktuale”, deklaroi ministrja Karianne Tung.

Ndër masat e mundshme, ajo përmendi ndalimin e funksioneve si njohja e fytyrës në hapësirat publike. Ministria planifikon gjithashtu ngritjen e një grupi ekspertësh, i cili do të japë rekomandime për rregullimin e kësaj teknologjie.

Syzet inteligjente, të cilat mund të pajisen me kamera, mikrofona dhe ekrane me realitet të shtuar, u mundësojnë përdoruesve të fotografojnë, të regjistrojnë dhe të shohin informacione të mbivendosura mbi mjedisin. Megjithëse pajisjet janë bërë subjekt debati për rreziqet e mbikëqyrjes, ato njihen njëkohësisht si mjete me vlerë për personat me aftësi të kufizuara vizuale.

Foto: cottonbro studio / Pexels