Ministria e Arsimit ka hapur për konsultim publik një projektligj që synon të harmonizojë legjislacionin shqiptar me direktivat europiane për njohjen e kualifikimeve profesionale. Nismës i nënshtrohen profesionistët e kualifikuar në Bashkimin Europian, Zonën Ekonomike Europiane dhe Zvicër, por edhe shqiptarët që kërkojnë të ushtrojnë profesionin në këto vende.

Drafti parashikon tre mekanizma njohje: sistemin e përgjithshëm, njohjen automatike bazuar në përvojën profesionale dhe njohjen automatike për profesionet sektoriale. Ndër të fundit përfshihen mjekët, infermierët, stomatologët, farmacistët, veterinerët, mamitë dhe arkitektët.

Për profesionet që nuk plotësojnë kriteret e njohjes automatike, autoritetet mund të kërkojnë masa kompensuese, si periudhë përshtatjeje deri në tre vjet ose test përshtatshmërie. Profesionistit i njihet e drejta të zgjedhë ndërmjet alternativave.

Projektligji vendos afate të qarta administrative dhe hap rrugën për përdorimin e Kartës Profesionale Europiane, si alternativë ndaj procedurave tradicionale. Njohja e kualifikimit nuk heq detyrimin e njohjes së gjuhës shqipe, por kontrolli gjuhësor duhet të jetë i justifikuar dhe proporcional.

Ligji do të hyjë në fuqi ditën e anëtarësimit të Shqipërisë në Bashkimin Europian, ndaj as efektet buxhetore nuk parashikohen të jenë të menjëhershme.