Prej disa javësh, njoftime për rekrutimin e rrobaqepëseve shqiptare për t’u punësuar në fabrika veshjesh në Itali kanë filluar të shfaqen në platformat online të agjencive të ndërmjetësimit të punësimit. Ofertat parashikojnë kontratë pune sipas legjislacionit italian, pagë neto nga 1,300 euro në muaj, 13 paga vjetore, pushime të paguara dhe akomodim të siguruar nga punëdhënësi. Kërkohet të paktën një vit eksperiencë në sektorin fason shqiptar dhe grupmoshë nga 20 deri në 50 vjeç. Pozicionet vijnë nga fabrika në Pisa, Bergamo dhe Perugia.

Ky fenomen ndodh ndërkohë që industria italiane e tekstilit përballet me mungesë të ndjeshme fuqie punëtore. Të dhënat e Unioncamere tregojnë se vështirësia për gjetjen e punonjësve në sektorin e tekstileve dhe veshjeve arrin në 56.2%, ndërsa për tremujorin korrik–shtator 2026 parashikohen rreth 20 mijë pozicione të reja.

Situata krijon shqetësim për industrinë fason shqiptare, e cila prej vitesh vuan nga mungesa e fuqisë punëtore vendase, rënia e kontratave, forcimi i lekut dhe rritja e kostove. Sipas ProEksport Albania, gjatë vitit 2025 sektori humbi rreth 12 mijë vende pune, ndërsa eksportet e tekstileve dhe këpucëve shënojnë rënie për katër vjet radhazi.

Foto: Kat Ya / Unsplash