Lëvizja Vetëvendosje ka njoftuar se disponon emrat e kandidatëve për presidentin e ardhshëm të Kosovës, megjithatë këta emra nuk do të bëhen publike para takimit me Lidhjen Demokratike të Kosovës. Ministri në detyrë i Punëve të Jashtme, Glauk Konjufca, deklaroi se kryeministri në detyrë Albin Kurti është i gatshëm për negociata me kryetarin e LDK-së, Lumir Abdixhiku, duke shprehur optimizëm për arritjen e një marrëveshjeje.

Sipas Konjufcës, publikimi i emrave para takimit do të dëmtonte procesin e negociimit. Ai theksoi se diskutimi do të zhvillohet nëpërmjet propozimit të emrave konkretë dhe se nga ky proces pritet të dalë presidenti ose presidentja e ardhshme e vendit.

“Emrat i kemi, por nuk mund t’i ndaj këtu. Do ta humbiste kuptimin procesi i negociimit”, u shpreh Konjufca, i cili shtoi se pret që takimi mes dy liderëve të mbahet gjatë kësaj jave. Megjithatë, ai bëri të ditur se kryeministri Kurti ende nuk ka marrë një ftesë zyrtare nga LDK-ja lidhur me datën konkrete të takimit.

Foto: Hansjörg Keller / Unsplash