Protestat e javëve të fundit në Shqipëri kanë zënë vend në faqet e medias ndërkombëtare. Deutsche Welle i ka kushtuar një reportazh të gjerë kësaj lëvizjeje qytetare, duke analizuar si një protestë fillimisht mjedisore u shndërrua në një revoltë të gjerë kundër korrupsionit dhe modelit të qeverisjes në vend.

Shkëndija e gjithçkaje ishte projekti i një resorti luksoz që Jared Kushner, dhëndri i presidentit amerikan Donald Trump, synon ta ngrejë në zonën e mbrojtur të Nartë-Vjosës, habitat natyror i flamingove dhe dhjetëra specieve të rrezikuara. Por shpejt indinjata qytetare u zgjerua përtej kësaj çështjeje, duke përfshirë pakënaqësi të grumbulluara ndaj klientelizmit, shpërdorimit të pushtetit dhe mungesës së perspektivës, veçanërisht për të rinjtë.

Korrespondenti Miodrag Soric ndalon edhe te pozita e kryeministrit Edi Rama, dobësia e opozitës dhe mungesa e një alternative të qartë politike. Reportazhi trajton gjithashtu tensionin midis zhvillimit ekonomik dhe mbrojtjes së mjedisit, si dhe rolin e mundshëm të Bashkimit Evropian dhe institucioneve të drejtësisë.

DW konstaton se “Revolucioni i Flamingove” ka tejkaluar kufijtë e një proteste mjedisore, duke u bërë simbol i pakënaqësisë ndaj qeverisjes, ndërkohë që mbetet e hapur pyetja nëse kjo valë do të sjellë ndryshime reale politike.