Kabineti shqiptar ka miratuar një sërë vendimesh në fushën e mbrojtjes, që prekin si legjislacionin fiskal ashtu edhe bashkëpunimin ushtarak ndërkombëtar.

Ndryshimet e reja në ligjin për TVSH-në synojnë të lehtësojnë procedurat për kompanitë që operojnë brenda industrisë së mbrojtjes, duke hapur rrugën për sjelljen e teknologjive të avancuara ushtarake në vend dhe mbështetjen e fabrikave vendase për prodhimin e pajisjeve ushtarake.

Një vendim tjetër i rëndësishëm lidhet me kantierit detar të Pashalimanit, i cili do të vihet në dispozicion të kompanisë italiane Fincantieri, në kuadër të një sipërmarrjeje të përbashkët me shoqërinë KAYO. Në këtë kantier parashikohet prodhimi i anijeve me gjatësi deri në 82 metra.

Qeveria miratoi gjithashtu angazhimin e Shqipërisë në një mision ndërkombëtar në Gaza, fillimisht me katër oficerë shtabi, ndërkohë që u pranua edhe një vendim lidhur me praninë e Forcave të Armatosura në Letoni.

Kabineti autorizoi shpërblime për zjarrfikësit dhe forcat e mbrojtjes të angazhuara gjatë sezonit të zjarreve, gjatë të cilit u menaxhuan 27 vatra masive me mbi 1.380 efektivë, pesë helikopterë dhe 90 mjete në terren.