Biznesmeni shqiptar Ermal Beqiri, i shpallur në kërkim ndërkombëtar nga SPAK në kuadër të dosjes së “AKSHI-t”, është ndaluar në Francë pas një incidenti ajror të pazakontë. Beqiri, ndaj të cilit GJKKO kishte caktuar masën “arrest në burg” në mungesë, u kap pasi pilotoi një avion të vogël civil mbi zonën e ndaluar ajrore të centralit bërthamor të Penly, në Seine-Maritime.

Sipas mediave franceze, avioni fluturonte në rreth 1.200 metra lartësi, por piloti uli papritur hundën e mjetit duke zbritur nën kufirin e lejuar prej 1.060 metrash mbi këtë objekt strategjik. Forcat Ajrore franceze ndërhynë menjëherë dhe shoqëruan avionin deri në aeroportin e Albertit, ku Beqiri u ndalua dhe u mor në pyetje.

Gjatë kontrollit, autoritetet i gjetën tre pajisje gjurmimi “AirTag” të fshehura në veshjet e tij, duke shtuar dyshimet rreth motiveve të fluturimit. Beqiri pretendoi se kishte gabuar me lartësinë dhe se në momentin kritik po bisedonte me nënën e tij, por shpjegimet u konsideruan të paqarta nga hetuesit. Edhe itinerari i fluturimit, që kalonte nëpër Calais dhe Bretanjë përpara incidentit, ka ngritur pikëpyetje. Beqiri u gjobit me 7.000 euro dhe u dorëzua autoriteteve kompetente, duke pritur fillimin e procedurave të ekstradimit drejt Shqipërisë.