Dy nga gjashtë basenet kryesore lumore në Shqipëri rangohen në kategorinë më të ulët të cilësisë së ujërave sipërfaqësore për vitin 2025, sipas Raportit të Gjendjes në Mjedis të Agjencisë Kombëtare të Mjedisit. Basenet Ishëm-Erzen dhe Seman klasifikohen në Klasën V, “Gjendje e keqe”, ndërsa Shkumbini ka rënë nga “Gjendje e mirë” në “Gjendje e moderuar”.

Situata më kritike evidentohet në basenin Ishëm-Erzen, ku stacionet e monitorimit pranë Tiranës dhe Erzenit regjistrojnë vlera të larta të Nevojës Biokimike për Oksigjen, amoniakut dhe lëndëve ushqyese. Edhe baseni i Semanit shënon përkeqësim krahasuar me vitin 2024, i lidhur kryesisht me ndotjen e lumit Gjanica afër Fierit, ku shkarkimet urbane dhe industriale mbajnë treguesit e cilësisë jashtë normave të lejuara.

Në kontrast me këtë, Vjosa dhe Drini ruajnë gjendjen më të mirë mjedisore, duke u klasifikuar në Klasën II, në përputhje me standardet e Direktivës Kuadër të Bashkimit Evropian për Ujin. Raporti nënvizon se cilësia e ujërave mbetet e kënaqshme në segmentet malore, por përkeqësohet ndjeshëm aty ku lumenjt kalojnë pranë qendrave të banuara, si pasojë e shkarkimeve urbane të patrajtuara dhe presionit nga aktiviteti industrial e bujqësor