Presidenti amerikan Donald Trump deklaroi se sulmet ushtarake të Shteteve të Bashkuara i kanë shkaktuar dëme të rënda Iranit, duke pretenduar se marina, forca ajrore, ushtria dhe një pjesë e madhe e sistemeve antiaerore të vendit janë neutralizuar. Gjatë një fjalimi në një impiant të General Motors në Michigan, Trump shtoi se kapacitetet iraniane për prodhimin e dronëve janë tkurrur deri në 7 për qind të nivelit të mëparshëm, ndërsa edhe infrastruktura raketore është goditur ndjeshëm.

Presidenti theksoi se administrata e tij është e vendosur të pengojë Iranin të zhvillojë armë bërthamore, duke pohuar se presioni ushtarak ka detyruar Teheranin të rikthehet në tryezën e negociatave. “Nëse nuk do të kishim vepruar kaq ashpër, nuk do të kishte bisedime”, u shpreh ai.

Trump shfrytëzoi rastin edhe për të kritikuar ish-presidentin Barack Obama, duke argumentuar se qasja diplomatike e administratës së kaluar ndaj Iranit kishte dështuar. Pavarësisht tonit të ashpër, ai pranoi se negociatat aktuale po zhvillohen në një atmosferë pozitive. Pretendimet e presidentit amerikan nuk janë verifikuar në mënyrë të pavarur, ndërsa detaje mbi ecurinë e bisedimeve mes dy vendeve nuk janë bërë publike.