Interi po shkruan një faqe të re të historisë së saj në merkaton verore. Klubi milanas ka arritur një marrëveshje me mbrojtësin anglez John Stones, i cili pritet të firmosë një kontratë dyvjeçare që do ta mbajë në Milano deri në vitin 2028. Ish-kapiteni i Manchester Cityt pritet të udhëtojë drejt Italisë brenda orëve në vijim për t’iu nënshtruar vizitave mjekësore, hapi i fundit përpara bërjes publike të transferimit. Mbrojtësi 32-vjeçar do të përfitojë një pagë prej rreth 4 milionë eurosh në sezon. Interi arriti ta fitojë garën me disa nga klubet më të mëdha europiane, mes tyre Chelsea, Arsenali dhe Juventusi, të cilët kishin shprehur gjithashtu interes për lojtarin. Stones lë pas dhjetë sezone në Premier League dhe një koleksion impresionues prej 20 trofeesh me “qytetarët”, duke përfshirë edhe një pjesëmarrje pozitive me kombëtaren angleze në Kupën e Botës. Megjithatë, drejtuesit e Interit nuk kanë ndërmend të ndalojnë këtu. Ardhja e Stones nuk e përjashton afrimin e Cristian Romeros, mbrojtësit argjentinas të Tottenhamit, edhe pse negociatat për të mbeten komplekse, shkaku i vlerësimit të lartë të klubit anglez dhe pagës së konsiderueshme të futbollistit.