Agjencia e Ushqimit dhe Veterinarisë (AUV) ka konfirmuar praninë e sëmundjes Lija e Dhenve dhe Dhive në katër komuna të Kosovës: Ferizaj, Kaçanik, Shtërpcë dhe Viti. Autoritetet veterinare kanë paralajmëruar për rrezikun real të përhapjes së mëtejshme të kësaj sëmundjeje nëpër fermat blegtorale të vendit.

AUV u ka bërë thirrje fermerëve që ruajnë dele dhe dhi të zbatojnë rreptësisht masat e biosigurisë. Ndër rekomandimet kryesore është ndalimi i lëvizjes së kafshëve pa autorizim veterinar, kufizimi i hyrjes së personave dhe automjeteve të paautorizuara, si dhe izolimi i kafshëve të sapoblera gjatë periudhës së vëzhgimit. Dezinfektimi i rregullt i objekteve dhe pajisjeve cilësohet gjithashtu si masë e domosdoshme.

Fermerët janë udhëzuar të njoftojnë menjëherë veterinerin privat ose inspektorët e AUV-së nëse vërejnë shenja si temperaturë të lartë, puçrra në lëkurë, rrjedhje nga sytë ose hunda dhe mungesë oreksi tek kafshët. AUV ka theksuar se kafshët e dyshuara nuk duhen trajtuar apo lëvizur pa udhëzimet e autoriteteve kompetente.

Sipas autoriteteve, kjo sëmundje nuk paraqet rrezik për shëndetin e njeriut, por shkakton dëme të konsiderueshme ekonomike për fermerët dhe sektorin blegtoral në tërësi.