Administrata Tatimore e Kosovës ka intensifikuar kontrollet ndaj bizneseve dhe individëve që veprojnë në industrinë e dasmave dhe organizimeve familjare, duke shfrytëzuar sezonin veror si moment strategjik për verifikimin e detyrimeve tatimore.

Në fokus të inspektimeve janë sallat e dasmave, hotelet, këngëtarët, grupet muzikore, DJ-të, fotografët dhe videografët, si dhe bizneset që ofrojnë veshje ceremoniale. Kontrolle do të zhvillohen gjithashtu ndaj makeup artistëve, frizerëve, dekoratorëve, organizatorëve të eventeve, kompanive të transportit për dasma, ëmbëltoreve dhe luleshitësve.

ATK u kërkon qytetarëve të raportojnë çdo rast të dyshuar mosdeklarimi të të ardhurave apo moslëshimi të kuponëve fiskalë, përmes platformës DENONCO ose Qendrës së Thirrjeve në numrin 038 222 165.

Institucioni thekson se çdo subjekt që ofron shërbime kundrejt pagesës ka detyrim ligjor të deklarojë të ardhurat dhe të paguajë tatimet sipas legjislacionit në fuqi. Sipas të dhënave zyrtare, vetëm gjatë periudhës janar–gusht 2024, nga këngëtarët janë mbledhur 2.3 milionë euro tatime, një shifër që pasqyron rritje të ndjeshme të pajtueshmërisë tatimore në sektorin e argëtimit.