Franca dhe Spanja po kalojnë një nga krizat më të rënda të zjarreve pyjore të viteve të fundit, ndërsa temperaturat ekstreme dhe erërat e forta vazhdojnë të nxisin përhapjen e flakëve. Situata është veçanërisht alarmante në jugperëndim të Francës, ku zjarri po i afrohet gjithnjë e më shumë qytetit të Bordeaux. Presidenti Emmanuel Macron mblodhi kabinetit të krizës për të koordinuar reagimin institucional, ndërsa paralajmërimet meteorologjike parashikojnë temperatura deri në 40 gradë Celsius gjatë ditëve në vijim. Kryebashkiaku i Bordeaux njoftoi se flakët ndodhen rreth 15 kilometra larg qytetit, duke saktësuar se nuk është planifikuar ende evakuimi i rreth 850 mijë banorëve, megjithëse dhjetëra mijëra persona janë larguar tashmë nga zonat përreth. Mbi rajonin e Girondës është formuar fenomeni i rrallë “pyrocumulonimbus”, një stuhi e gjeneruar nga vetë zjarri, e cila e bën luftën me flakët pothuajse të pamundur. Deri tani, rreth 42 mijë hektarë pyje janë djegur vetëm në jugperëndim të Francës. Edhe Spanja po përballet me një situatë të ngjashme dramatike, me mbi 77 mijë hektarë të shkrumbuar dhe mbi 90 mijë persona të evakuuar. Në total, mbi 330 mijë njerëz janë detyruar të braktisin shtëpitë e tyre në të dy vendet.