Tensionet në krahun lindor të NATO-s vijojnë të rriten pas një incidenti të ri në hapësirën ajrore të Rumanisë. Shtabet e Bukureshtit njoftuan se një avion luftarak F-16 i ushtrisë rumune rrëzoi të dielën në mëngjes një dron të paidentifikuar, i cili kishte hyrë pa leje në territorin ajror të vendit. Bëhet fjalë për incidentin e tretë të këtij lloji brenda vetëm tre ditësh, duke shtuar shqetësimet e autoriteteve në lidhje me sigurinë e kufijve.

Sipas Ministrisë së Mbrojtjes, mjeti pa pilot u neutralizua rreth orës 10:13 mbi ujërat territoriale rumune, afërsisht 12 kilometra në verilindje të Sulinës. Hetimet mbi mbetjet e dronëve të rrëzuar më parë sugjerojnë se bëhet fjalë për modelin Shahed, i cili përdoret gjerësisht nga forcat ruse në konfliktin e Ukrainës.

Presidenti rumun Nicușor Dan vlerësoi reagimin e pilotëve dhe njoftoi se Rumania do të ndërmarrë një demarsh diplomatik ndaj Moskës pasi të përfundojnë hetimet. Ai theksoi se çdo shkelje e hapësirës ajrore rumune trajtohet me seriozitetin maksimal, duke qenë njëkohësisht hapësirë e NATO-s dhe e Bashkimit Evropian. Ushtria rumune ka intensifikuar patrullimet dhe monitorimin e zonës kufitare me Ukrainën.