Ish-zëvendësministri i Drejtësisë, Arben Isaraj, ka drejtuar një mesazh kritik ndaj kryeministrit Edi Rama, duke vënë në qendër të vëmendjes vlerat e besës, besimit dhe ndershmërisë në qeverisje. Nëpërmjet një postimi publik, ish-zyrtari socialist thekson se çdo shoqëri e qytetëruar ngrihet mbi një kapital moral të padukshëm, por të pazëvendësueshëm, pikërisht besimin.

Sipas Isarajt, ky besim nuk fitohet nëpërmjet fjalëve, por ndërtohet me karakter, ndershmëri dhe përgjegjësi. Ai paralajmëron se gënjeshtra, edhe kur sjell përfitime të çastit, lë plagë të thella në marrëdhëniet njerëzore dhe prish integritetin moral të individit. Në kulturën shqiptare, vëren ai, ky parim mishërohet veçanërisht në konceptin e besës, e cila simbolizon jo vetëm mbajtjen e fjalës, por edhe përgjegjësinë për të qenë i vërtetë.

Isaraj mbyll mesazhin e tij me një krahasim domethënës: “Besa dhe besimi janë si qelqi: një gënjeshtër i thyen, por nuk i kthen më si ishin”. Vetëm mbi themelet e së vërtetës dhe ndershmërisë, sipas tij, mund të ndërtohen institucione të besueshme dhe një shoqëri e drejtë.