Situata shëndetësore në Gostivar po shënon shenja qetësimi, njoftoi ministri i Shëndetësisë së Maqedonisë së Veriut, Sasho Klekovski, gjatë një vizite në Spitalin Special për Sëmundje të Mushkërive në Leshok. Numri i rasteve të reja ka rënë ndjeshëm, duke arritur në rreth 80 raste ditore, pothuajse dyfish më pak krahasuar me ditët e mëparshme. Gjithsej janë prekur rreth 4 mijë persona, ndërsa 750 raste janë klasifikuar si sëmundje ngjitëse. Pavarësisht tendencës pozitive, uji i ujësjellësit të Gostivarit mbetet i papërdorshëm, as për qëllime teknike, pasi niveli i klorit nuk ka arritur standardet e kërkuara. Autoritetet po kryejnë matje të rregullta dhe leja për përdorim do të jepet vetëm pas konfirmimit zyrtar.

Në kuadër të hetimeve penale, gjykata ka urdhëruar 30 ditë paraburgim për tre të dyshuarit që akuzohen se instaluan në mënyrë të paligjshme një pompë në tubacionin kryesor, duke futur ujë të ndotur nga lumi Vardar në rrjetin e furnizimit. Akuzat parashikojnë dënim minimal prej katër vitesh burgim. Qeveria ka shpallur gjendje krize 30-ditore, ndërsa kryeministri Mickoski ka bërë të ditur se përgjegjësia kryesore është identifikuar, duke lënë të hapur mundësinë e zgjerimit të mëtejshëm të hetimeve.