Qeveria shqiptare ka përgatitur një projektligj për disa ndryshime dhe shtesa në ligjin nr. 9920 “Për procedurat tatimore”, me qëllim forcimin e disiplinës fiskale, rritjen e efektivitetit të mbledhjes së të ardhurave dhe kufizimin e hapësirave për abuzim.

Nisma ligjore vjen pas rënies me 5% të të ardhurave nga tatim-fitimi gjatë 8-mujorit të këtij vit (38,6 miliardë lekë), çka ka nxitur Ministrinë e Financave të shtrëngojë masat administrative ndaj subjekteve që nuk shlyejnë në kohë këstet paraprake.

Ndryshimet kryesore të propozuara në projektligj: Parapagimi si detyrim tatimor: Parapagimet e tatim-fitimit dhe tatimit mbi të ardhurat klasifikohen zyrtarisht si detyrim tatimor pas maturimit të tyre. Kjo i jep të drejtë administratës tatimore të zbatojë menjëherë procedurat e mbledhjes me forcë për këstet e papaguara, pa pritur deklarimin përfundimtar të datës 31 mars.

Kontrollet pa njoftim gjatë çregjistrimit: Për kontrollet tatimore që kryhen gjatë procedurës së çregjistrimit të subjekteve (neni 45), hiqet detyrimi i njoftimit paraprak (neni 81), me qëllim që verifikimi i situatës reale të kryhet brenda afatit ligjor prej 30 ditësh pune.

Ashpërsimi i gjobave për pagesat në para në dorë (Cash): Riformulohet neni 120, duke shtrirë sanksionin prej 10% të vlerës së transaksionit jo vetëm për blerjet/shitjet mes bizneseve, por edhe për transaksionet me para në dorë mes bizneseve dhe konsumatorëve që tejkalojnë kufijtë e lejuar ligjorë.

Sanksione për transferimin e çmimit: Vendoset një gjobë e posaçme prej 100,000 deri në 150,000 lekë për bizneset që nuk paraqesin pranë organit tatimor dokumentacionin e transferimit të çmimit brenda afatit ligjor 45-ditor pas kërkesës zyrtare.

Projektligji përbëhet nga 5 nene dhe parashikohet të hyjë në fuqi 15 ditë pas botimit në Fletoren Zyrtare.