Analisti i sigurisë Drizan Shala ka publikuar dëshmi shqetësuese se ushtria shqiptare po vëzhgohet prej kohësh nga një llogari serbe në rrjetet sociale. Në një analizë të botuar në Tirana Examiner, Shala zbulon se më 2 tetor llogaria “Dunav Intel” në platformën X, e cila i vulos fotografitë me cirilikë serbe, publikoi pamje të pretenduara si ekskluzive nga poligoni i Forcave të Armatosura në Bizë.

Në fotografitë e bëra nga një pikë mbi poligon gjatë pranisë së trupave, dallohen radhët e çadrave, kazerma të vjetra dhe kolona mjetesh taktike. Llogaria në fjalë pretendon se e vëzhgon Bizën prej më shumë se dy vitesh, ndërsa regjistron një nga një edhe fluturimet e dronëve ushtarakë shqiptarë “Bayraktar” nga baza ajrore e NATO-s në Kuçovë, nëpërmjet kodeve të transponderit.

Analisti Drizan Shala e cilëson këtë veprimtari si pjesë të një përpjekjeje armiqësore:

“Kjo llogari është një pjesë e dukshme e një përpjekjeje më të gjerë për të vëzhguar Forcat e Armatosura shqiptare, me karakter armiqësor dhe në interes të Serbisë.”

Duke ndërlidhur ngjarjen me hetimet e Prokurorisë së Posaçme (SPAK) në Ministrinë e Mbrojtjes, analiza e Tirana Examiner bën me dije se pajisja që po hetohet për procedurat e blerjes është pikërisht një sistem antidron, i cili do të shërbente për asgjësimin e mjeteve fluturuese mbi baza ushtarake.

Mbi rrjedhjen e të dhënave hetimore dhe situatën e krijuar brenda institucioneve të mbrojtjes, Drizan Shala përmbledh:

“Dikur pyetja ishte kush po e vëzhgon ushtrinë shqiptare. Tani është pse kaq shumë njerëz brenda Shqipërisë po ia bëjnë ushtrisë më të vështirë t’i ndalë ata që e vëzhgojnë. Punën e armikut po e bëjmë vetë.”