Debati për teknologjinë në vendin e punës është përqendruar prej vitesh te pyetja se cilat detyra do të automatizohen.

Por një qasje tjetër po merr rëndësi: jo vetëm çfarë pune mund të bëjnë makineritë, por si teknologjia mund të ndryshojë mënyrën se si organizohet vetë puna.

Në këtë kuadër hyn koncepti “OrgTech”, që përfshin teknologjitë që ndikojnë në ndarjen e detyrave, koordinimin e ekipeve, shpërndarjen e vendimmarrjes, monitorimin e performancës dhe zgjidhjen e problemeve brenda organizatave.

Phanish Puranam, profesor i Strategjisë dhe Dizajnit Organizativ në INSEAD, së bashku me studiuesit Piyush Gulati nga University College London dhe Arianna Marchetti nga Singapore Management University, diskutuan së fundmi se si teknologjia po ndryshon strukturën tradicionale të menaxhimit.

Sipas tyre, mjetet dixhitale mund të forcojnë jo vetëm koordinimin nga menaxherët, por edhe bashkëpunimin direkt mes punonjësve.

Teknologjitë për menaxhimin e punës në grup mund të ulin nevojën për nivele të shumta drejtuese dhe të bëjnë organizatat më të decentralizuara.

Një kulturë e fortë organizative mund të sigurojë gjithashtu koordinim të ngjashëm me atë që tradicionalisht arrihet përmes hierarkisë dhe autoritetit vertikal.

Si mund të ndryshojë Inteligjenca Artificiale rolin e menaxherit

Ndikimi i Inteligjencës Artificiale pritet të jetë edhe më i madh. Sipas Puranam, menaxherët mund të kalojnë gradualisht nga roli i kontrollit dhe mbikëqyrjes drejt rolit të trajnerit dhe mësuesit.

Në të ardhmen, ata mund të jenë më të përfshirë në zhvillimin e aftësive të punonjësve, ndërsa një pjesë e monitorimit rutinë mund të kryhet nga sistemet e automatizuara.

Një tjetër rol i ri mund të jetë menaxhimi i bashkëpunimit mes njerëzve dhe agjentëve të Inteligjencës Artificiale. Menaxherët do të duhet të përcaktojnë vazhdimisht se cilat detyra duhet t’u mbeten njerëzve, cilat mund t’i kryejë IA dhe si duhet të koordinohen të dyja palët.

Kjo do të krijonte një kategori të re aftësish menaxheriale dhe, sipas Puranam, mund të ruajë apo edhe të rrisë nevojën për menaxherë, ndonëse natyra e punës së tyre do të ndryshojë.

Efikasitet pa humbur faktorin njerëzor

Puranam thekson se kompanitë nuk duhet ta shohin teknologjinë vetëm si mjet për rritjen e fitimeve, produktivitetit dhe inovacionit.

Organizatat janë gjithashtu vende ku njerëzit ndërtojnë marrëdhënie, zhvillohen profesionalisht dhe gjejnë kuptim në punën që bëjnë.

“Një pjesë e madhe e punës sonë është të kuptojmë se si mund ta përdorim IA në organizata për t’i bërë ato më të orientuara drejt objektivave, më fitimprurëse, më efikase dhe më inovative, pa sakrifikuar dimensionin njerëzor”, thotë Puranam.

Teksa teknologjia bëhet gjithnjë e më e aksesueshme dhe më pak një avantazh unik konkurrues, kapitali njerëzor mund të kthehet në elementin kryesor që diferencon një kompani nga një tjetër. Për këtë arsye, mënyra se si kompanitë organizojnë njerëzit dhe teknologjinë së bashku mund të bëhet po aq e rëndësishme sa vetë teknologjia. / Insead