Aksionet globale të teknologjisë ranë të hënën, pasi kompanitë më të mëdha të inteligjencës artificiale bënë thirrje për një ngadalësim të zhvillimit të teknologjisë, pas disa ditësh paralajmërimesh dramatike lidhur me sigurinë e saj.

Aksionet e kompanive të memories dhe prodhuesve të çipave shënuan disa nga rëniet më të forta të hënën, përpara hapjes së Wall Street, ndërsa investitorët spekuluan se një ngadalësim i zhvillimit të AI mund të përkthehej në më pak shpenzime për infrastrukturën. Sandisk, Intel dhe Micron ranë të gjitha me më shumë se 5% në tregtimin para hapjes së bursës, ndërsa Nvidia humbi 2.9%.

Kontratat futures që ndjekin indeksin Nasdaq 100 ranë me 1.8%.

“Në thelb, pyetja që shtrohet është nëse rritja e masave për sigurinë e AI do të nënkuptojë shpenzime kapitale më të ngadalta dhe më të ulëta dhe, më pas, çfarë do të thotë kjo për rritjen ekonomike globale dhe fitimet nga këndvështrimi i tregut të aksioneve”, tha Emmanuel Cau, drejtues i strategjisë për aksionet europiane në Barclays.

Presioni mbi aksionet e lidhura me inteligjencën artificiale erdhi pasi Dario Amodei, drejtori ekzekutiv i Anthropic, bëri thirrje gjatë fundjavës që kompanitë në pararojë të zhvillimit të AI të bashkërendojnë veprimet për të menaxhuar zhvillimin e teknologjisë dhe për të rritur sigurinë e saj. Sam Altman i OpenAI dhe drejtuesi i SpaceX, Elon Musk, e mbështetën nismën.

Ministria e Jashtme e Kinës u duk se i hodhi poshtë të hënën paralajmërimet, duke i cilësuar si nxitje frike dhe duke deklaruar se zhvillimi i inteligjencës artificiale ishte “një forcë për të mirën”.

“Përhapja e narrativave të ndryshme kërcënuese dhe përfshirja në konfrontim dhe konkurrencë keqdashëse vetëm sa do të prishin procesin e qeverisjes globale të inteligjencës artificiale dhe nuk u shërbejnë interesave të asnjërës palë”, tha zëdhënësi i ministrisë, Guo Jiakun.

Aksionet e SpaceX ranë me 2.3% në tregtimin para hapjes së bursës të hënën. Microsoft, që zotëron një pjesë të konsiderueshme të OpenAI, ra me 0.6%.

Indeksi Kospi i Koresë së Jugut, me peshë të madhe të kompanive teknologjike, udhëhoqi rëniet në Azi, duke humbur 3.3%. Aksionet e teknologjisë ishin ndër performuesit më të dobët edhe në Europë, ku nënindeksi teknologjik i Stoxx Europe 600 ra me 2.5%. Prodhuesi i çipave ASML humbi 6.2%.

Shqetësimet për teknologjinë shpërthyen hapur javën e kaluar pasi një studiues i Anthropic dha dorëheqjen, duke deklaruar se kompania e Silicon Valley dhe OpenAI po “luanin bixhoz me jetët tona”, ndërsa dy rivalët e mëdhenj luftonin për të qëndruar në krye të garës së inteligjencës artificiale.

Si shenjë e shqetësimit të investitorëve, aksionet e kompanisë japoneze SoftBank, e cila zotëron rreth 13% të OpenAI, ranë me 10.7%.

Debati i fortë mbi sigurinë e teknologjisë vjen në një moment delikat për tregjet globale të aksioneve, të cilat janë nxitur fuqishëm nga bumi i inteligjencës artificiale që kur OpenAI lançoi ChatGPT në vitin 2022. Situata rrezikon gjithashtu të komplikojë ofertën publike fillestare (IPO) të planifikuar nga Anthropic, e cila pritet të zhvillohet këtë vit.

“Ndërsa koha e IPO-së së Anthropic mbetet e paqartë, duket se OpenAI po e shtyn të vetën të paktën deri vitin e ardhshëm”, tha Cau.

“Në një moment, përdoruesit dhe qeveritë do të fillonin të ndiheshin të shqetësuar” për kërcënimet e mundshme ndaj sigurisë, tha Pruksa Iamthongthong, drejtuese e aksioneve të Azi-Paqësorit në Aberdeen.

Kompanitë aziatike që furnizojnë infrastrukturën për zhvillimin e inteligjencës artificiale kanë qenë ndër fitueset më të mëdha në tregjet globale të aksioneve gjatë këtij viti. Indekset e Koresë së Jugut dhe Tajvanit, të udhëhequra nga prodhuesit e çipave, janë rritur të dyja me rreth 60%.

Të hënën, prodhuesit e çipave të memories u goditën veçanërisht fort. Aksionet e Kioxia ranë me më shumë se 6%, ndërsa Samsung Electronics humbi 4.1%.

Disa investitorë thanë se perspektiva e një mbikëqyrjeje më të madhe të kompanive të inteligjencës artificiale mund të rezultojë, në fund, pozitive.

“Ajo që nuk do të doje të ndodhte është që gjithçka të vazhdonte me një shpejtësi marramendëse dhe papritur të kishim një ndalim të plotë”, tha Iamthongthong. “Kjo do të ishte një situatë shumë më e keqe.”

Në Hong Kong, aksionet e start-up-eve kineze të inteligjencës artificiale Z.AI dhe MiniMax ranë përkatësisht me 9.1% dhe 6.5%.

Analistët ia atribuuan rënien e Z.AI njoftimit të grupit gjatë fundjavës se planifikonte të siguronte kapital shtesë përmes emetimit të aksioneve dhe borxhit./FINANCIAL TIMES