Ndërmjetësimi turistik ka njohur një transformim rrënjësor gjatë dekadave të fundit, duke kaluar nga agjencitë tradicionale të udhëtimit tek platformat digjitale dhe, më tej, drejt inteligjencës artificiale. Dikur turistët organizonin vetë udhëtimet ose kërkonin ndihmën e agjentëve, ndërsa sot platformat online si Booking.com dhe Expedia kanë revolucionarizuar procesin e rezervimit, duke e bërë atë të menjëhershëm dhe transparent.

Ekspertët e fushës paralajmërojnë se AI gjenerative po shënon një kthesë të re: nga epoka e kërkimit po kalohet në epokën e rekomandimit. Turisti nuk do të analizojë më qindra oferta, por do t’i paraqesë inteligjencës artificiale nevojat dhe preferencat e tij, duke marrë rekomandime të personalizuara. Kompani si Hilton kanë nisur tashmë integrimin e këtyre sistemeve, duke lançuar platformën “Hilton AI Planner” që mundëson komunikim bisedor me turistin.

Ky realitet i ri ngre pyetje të rëndësishme për turizmin shqiptar: sa janë të përgatitura bizneset vendase për integrimin e AI-së? Institucionet shtetërore, universitetet dhe operatorët turistikë duhet të japin përgjigje me kohë, pasi beteja e ardhshme konkurruese nuk do të zhvillohet vetëm për çmimin apo cilësinë, por edhe për pozicionimin në rekomandimet e inteligjencës artificiale.

Foto: Markus Winkler / Unsplash