Të dhënat e Autoritetit të Komunikimeve Elektronike dhe Postare për tremujorin e dytë të vitit 2025 konfirmojnë një tendencë të qartë: shqiptarët po e përdorin celularin gjithnjë e më shumë për internet dhe gjithnjë e më pak për thirrje tradicionale e mesazhe.

Trafiku i internetit nga rrjetet celulare shënoi rritje vjetore prej 24.6%, ndërsa konsumi mesatar për përdorues arriti në 12.27 GB në muaj. Kjo rritje lidhet edhe me zgjerimin e rrjeteve 5G, të cilat, sipas raportimeve të operatorëve, mbulojnë tashmë 70% të popullsisë, megjithëse mbulimi territorial mbetet në 36%. AKEP sqaron se këto shifra bazohen në vetëdeklarime të operatorëve dhe nuk janë verifikuar me monitorime të pavarura.

Në kahun e kundërt, thirrjet zanore dhe mesazhet e shkruara vazhduan rënien. Trafiku i thirrjeve dalëse u pakësua me 7.7%, ndërsa numri i mesazheve të shkruara u ul me 16.4% në terma vjetorë. Çdo abonent foli mesatarisht 132 minuta në muaj dhe dërgoi vetëm 11 mesazhe, shifra që reflektojnë migrimin e komunikimit drejt aplikacioneve si WhatsApp. Numri i kartave SIM aktive mbeti praktikisht i pandryshuar, me rritje simbolike prej 0.2%.

Foto: ROBIN WORRALL / Unsplash