Qindra protestues po marshojnë drejt Ambasadës së Malit të Zi në Tiranë, duke shprehur indinjatën e tyre ndaj vendimit të autoriteteve malazeze për të bllokuar një autokolonë me emigrantë shqiptarë. Kolona, e cila po drejtohej nga diaspora drejt Shqipërisë për të marrë pjesë në protestat e opozitës, është ndalur me forcë në Nikshiq, duke nxitur reagime të forta në mesin e turmës.

Atmosfera gjatë marshimit ka qenë e ngarkuar, me protestuesit që kanë skanduar thirrjen “Shqiptarët e bashkuar, pushteti i mbaruar!”, si shprehje e solidaritetit me bashkëkombasit e bllokuar jashtë vendit. Gjatë procesionit nuk kanë munguar as thirrjet me drejtim të qartë politik, ku protestuesit kanë kërkuar burgosjen e kryeministrit Edi Rama dhe të ministres Belinda Balluku.

Marshimi synon të përfundojë pikërisht përpara godinës së ambasadës malazeze, ku pritet të mbahet një tubim i organizuar kundër masave të marra nga Podgorica. Organizatorët e protestës e cilësojnë bllokimin e autokolonës si një ndërhyrje të papranueshme në lirinë e lëvizjes dhe të grumbullimit të qytetarëve shqiptarë.

Foto: Teemu Paananen / Unsplash