Fatjon Muçaj, një emigrant shqiptar që udhëtonte nga Anglia për të marrë pjesë në protestën e planifikuar në Tiranë, ka denoncuar bllokimin e autokolonës së tij në pikën kufitare të Nikshiqit, në Mal të Zi. Sipas tij, rreth 30 automjete qëndronin të ndaluara prej katër orësh pa asnjë shpjegim zyrtar nga autoritetet malazeze.

Muçaj tha se vendimi për bllokimin vinte si urdhër, duke dyshuar se ky veprim lidhej drejtpërdrejt me qëllimin e tyre për të protestuar kundër qeverisë shqiptare. Për të shmangur bllokimet, disa pjesëtarë të grupit zgjodhën kalime të tjera kufitare.

I pyetur për arsyet që e shtynë të emigrojë, ai foli për mungesën e meritokracisë, duke theksuar se shumë miq të tij, pavarësisht diplomave universitare, nuk kishin gjetur dot punë. “Duam një vend ku punësimi bazohet te aftësitë, jo te lidhjet dhe paratë”, u shpreh ai.

Muçaj nënvizoi se asgjë nuk do ta pengonte të arrinte në Tiranë, duke deklaruar se nëse do të ishte e nevojshme, grupi i tij do të gjente rrugë alternative për të hyrë në vend. Diaspora shqiptare pritet të jetë pjesë e rëndësishme e protestës së nesërme.

Foto: Nick Fewings / Unsplash