Qeveria shqiptare miratoi të premten dy vendime që reformojnë ndjeshëm kuadrin ligjor të koncesioneve dhe partneritetit publik privat, në zbatim të ligjit nr. 88/2025.

Sipas vendimit të parë, Komisioni i Prokurimit Publik fiton kompetencën për të shqyrtuar pavlefshmërinë e kontratave të koncesionit dhe PPP-ve. Operatorët ekonomikë kanë të drejtë të paraqesin ankim brenda gjashtë muajve nga nënshkrimi i kontratës. Me regjistrimin e ankesës, KPP-ja pezullon menjëherë zbatimin e kontratës deri në një vendim përfundimtar, me përjashtim të rasteve kur kjo cenon interesin e përgjithshëm. Nëse konstatohen shkeljet e parashikuara në nenin 72 të ligjit, Komisioni mund ta shpallë kontratën absolutisht të pavlefshme. Në rastet kur kontrata mbetet në fuqi, KPP-ja mund të shkurtojë afatin e saj ose të vendosë gjobë deri në 10 për qind të vlerës kontraktore.

Vendimi i dytë rregullon komunikimin elektronik në procedurat konkurruese të koncesionit, duke parashikuar publikimin dhe dorëzimin e ofertave nëpërmjet platformave dixhitale. Akti shfuqizon rregullat e vitit 2014 dhe do të hyjë në fuqi njëkohësisht me ligjin nr. 88/2025.

Foto: Romain Dancre / Unsplash