Diaverum AB është shpallur fituese e një tenderi për ofrimin e shërbimit të hemodializës në pesë spitale rajonale të vendit, me një ofertë prej rreth 4.44 miliardë lekësh pa TVSH. Kontrata, e cila do të zgjasë 48 muaj, përfshin qendrat e hemodializës pranë spitaleve të Shkodrës, Lezhës, Korçës, Vlorës dhe Elbasanit. Procedura u zhvillua nga Operatori i Shërbimeve të Integruara të Sterilizimit, me një fond limit prej 4.59 miliardë lekësh. Diaverum AB ishte operatori i vetëm që paraqiti ofertë dhe u shpall fitues më 10 shtator 2026.

Kompania fituese lidhet drejtpërdrejt me DiaVita sh.p.k., shoqëria koncesionare që ka ofruar deri më tani këtë shërbim nëpërmjet një kontrate PPP të nënshkruar në shkurt 2016. Në vitin 2019, Diaverum International AB bleu 100 për qind të kapitalit të DiaVita-s, duke marrë kontrollin e plotë të shoqërisë koncesionare. Kjo nënkupton se, pavarësisht ndryshimit të formës së kontraktimit nga PPP-ja e mëparshme në një tender të ri shërbimi, grupi suedez vazhdon të mbajë kontrollin mbi ofrimin e hemodializës në të njëjtat spitale. Tenderi ishte shpallur më 17 gusht, me afat dorëzimi ofertash deri më 1 shtator.

Foto: César Badilla Miranda / Unsplash