Roma hapi për publikun një nga zbulimet më domethënëse arkeologjike të dekadave të fundit: një kompleks monumental me afreske dhe mozaikë nga epoka romake, i mbuluar për shekuj nën tokën e kodrës Oppian, pranë Koloseut. Muzeu i ri, i inauguruar në këtë zonë, përfshin dy objekte kryesore: “Qytetin e Pikturuar” dhe “Mozaikun e Madh”, të dyja nga shekulli i parë pas Krishtit, të zbuluara gjatë gërmimeve të viteve 1990.

Mozaiku monumental, që arrin afërsisht 15 metra lartësi, paraqet kolona, elemente arkitekturore dhe figura njerëzore të shpërndara në katër nivele, ndërsa afreskat ilustrojnë një qytet portual të parë nga lart. Kryebashkiaku Roberto Gualtieri i cilësoi këto vepra “unike në botë”, si për vlerat artistike, ashtu edhe për rëndësinë historike.

Banjat termale të Trajanit, të projektuara nga Apollodori i Damaskut dhe të hapura në vitin 109 pas Krishtit, shtriheshin mbi 60 mijë metra katrorë. Krahas restaurimit të veprave, janë krijuar rrugë këmbësorësh, pikëvështrime panoramike dhe hapësira kulturore. Vizitat do të jenë të kufizuara: nga 2 tetori, vendi do të jetë i hapur të premten deri të dielën, me maksimumi 15 persona për grup.

Foto: Adrien Antal / Unsplash