Presidenti serb Aleksandar Vuçiq njoftoi të martën mbrëma se zgjedhjet e parakohshme parlamentare në Serbi do të zhvillohen më 25 tetor. Në një deklaratë për Radio Televizionin e Serbisë, Vuçiq bëri të ditur se të mërkurën në mesditë do të nënshkruajë dekretet për shpërndarjen e Kuvendit dhe shpalljen zyrtare të zgjedhjeve. Presidenti shprehu shpresë se ky proces do t’i japë fund krizës aktuale politike në vend.

Njoftimi vjen një ditë pasi qeveria miratoi propozimin e kryeministrit Gjuro Macut për t’i dërguar letër presidentit me kërkesën për shpërndarjen e parlamentit. Zgjedhje të parakohshme kanë kërkuar prej majit 2025 studentët që mbajnë të bllokuara universitetet dhe kanë udhëhequr protesta të gjata kundër qeverisë, duke pretenduar përgjegjësi institucionale për vdekjen e 16 personave gjatë shembjes së çatisë së stacionit hekurudhor në Novi Sad, në nëntor 2024.

Zgjedhjet e fundit parlamentare u mbajtën në dhjetor 2023 dhe u shoqëruan me akuza të rënda nga opozita, organizatat joqeveritare dhe vëzhguesit ndërkombëtarë për parregullsi të shumta. Ndërsa autoritetet pretendojnë se kushtet zgjedhore janë përmirësuar sipas rekomandimeve të ODIHR-it, organizata vendëse vlerësojnë se problemet themelore mbeten të pazgjidhura.

Foto: James Eades / Unsplash