Guvernatori i Bankës së Shqipërisë, Gent Sejko, zhvilloi sot një takim me një delegacion të Bankës Botërore, në të cilin morën pjesë Massimiliano Paolucci, Përfaqësues i Zyrës vendore, Emilia Skrok, Menaxhere për Politikat Fiskale dhe Rritjen Ekonomike për rajonin, si dhe ekonomistja e lartë Angella Montfaucon.

Sejko falënderoi Bankën Botërore për mbështetjen e vazhdueshme teknike ndër vite, veçanërisht në fushën e mbikëqyrjes bankare, sistemeve të pagesave dhe edukimit financiar. Guvernatori paraqiti gjendjen aktuale ekonomike të vendit, duke vënë në dukje ecurinë pozitive të rritjes ekonomike, stabilitetin financiar dhe nivelin e inflacionit pranë objektivit të bankës.

Diskutimet u përqendruan ndër të tjera te modernizimi i infrastrukturës së pagesave. Sejko theksoi rëndësinë e anëtarësimit të Shqipërisë në SEPA dhe njoftoi se projekti TIPS Clone, sistem i pagesave në kohë reale i zhvilluar në bashkëpunim me Bankën e Italisë dhe Bankën Qendrore Evropiane, pritet të jetë funksional në nëntor 2026. Ky sistem do të mundësojë transaksione të shpejta dhe të sigurta gjatë gjithë javës, duke ulur kostot dhe duke nxitur formalizimin e ekonomisë.

Paolucci vlerësoi përparimin e Shqipërisë dhe konfirmoi vazhdimësinë e asistencës teknike nga Banka Botërore.

Foto: Vitaly Gariev / Unsplash