Numri i nxënësve në arsimin fillor në Shqipëri ka shënuar rënie të ndjeshme gjatë vitit 2024, duke arritur në 141 089, nga 146 962 që ishin regjistruar një vit më parë. Kjo tkurrje prej rreth 4%, ose 5 873 nxënës më pak, tejkalon ndjeshëm mesataren e Bashkimit Europian, ku rënia e regjistruar në të njëjtin vit ishte vetëm 0.2%.

Rënia ka prekur kryesisht sektorin publik, ku numri i nxënësve u ul me rreth 5.1%, duke zbritur nga 130 067 në 123 491. Ndërkohë, arsimi privat shënoi kahun e kundërt, me një rritje prej 4.2%, duke kaluar nga 16 895 në 17 598 nxënës.

Sa i përket stafit mësimor, 87.6% e mësuesve të arsimit fillor në Shqipëri janë gra, ndërsa burrat zënë vetëm 12.4% të totalit, një dominim i theksuar që pasqyron një prirje të qëndrueshme në vite.

Në nivel europian, Franca, Gjermania, Spanja dhe Italia mbeten vendet me numrin më të lartë të nxënësve në arsimin fillor, ndërsa Malta, Luksemburgu dhe Qipro regjistrojnë shifrat më të ulëta. Raporti nxënës-mësues në BE ka rënë nga 14.2 në vitin 2014 në 13.3 në vitin 2024, duke reflektuar investime në rritje në burimet njerëzore të sistemeve arsimore.

Foto: Shubham Sharan / Unsplash