Protesta e 101-të kundër qeverisë së kryeministrit Edi Rama përfundoi në kryqëzimin e 21 Dhjetorit, pas një dite intensive që nisi para godinës së Kuvendit. Gjatë ditës, protestuesit u përlesën me forcat e policisë pasi hodhën vezë drejt automjeteve të deputetëve, ndërsa më pas marshuan drejt Drejtorisë së Policisë dhe bllokuan disa rrugë në kryeqytet.

Gjithsej 20 protestues janë shoqëruar në komisariate, ku disa qytetarë vijojnë të qëndrojnë jashtë ndërtesave duke kërkuar lirimin e tyre. Gazetari Shpend Gashi dhe disa të tjerë u liruan gjatë natës, ndërsa autoritetet pritet të lëshojnë të lirë edhe aktivistët e mbetur.

Aktivisti Arben Kola u bëri thirrje qytetarëve të grumbullohen sërish nesër në sheshin “Skënderbej” në të njëjtën orë si çdo ditë. Ai bëri gjithashtu apel për solidaritet me protestuesit e shoqëruar, duke u kërkuar atyre që kanë mundësi të drejtohen drejt Komisariatit numër 6. Qytetarët kërkojnë largimin e qeverisë, të cilën e akuzojnë për korrupsion dhe keqmenaxhim të vendit.

Foto: Teemu Paananen / Unsplash