Kosova vazhdon të mbetet ndër vendet me performancën më të ulët në testin ndërkombëtar PISA, sipas rezultateve të vitit 2025 të publikuara nga Ministria e Arsimit. Në vlerësim morën pjesë 6.632 nxënës 15-vjeçarë nga 213 shkolla, dhe rezultatet e tyre vazhdojnë të qëndrojnë ndjeshëm nën mesataren e vendeve anëtare të OECD-së.

Nxënësit kosovare shënuan 357 pikë në shkencë, 340 pikë në lexim dhe 350 pikë në matematikë. Krahasuar me vitin 2022, rënia më e ndjeshme u regjistrua në matematikë me pesë pikë më pak, ndërsa rezultatet në shkencë dhe lexim mbetën pothuajse të pandryshuara. Performanca më e mirë u shënua në fushën e zgjidhjeve kompjuterike me 359 pikë.

Një ndër gjetjet kryesore të PISA 2025 janë dallimet gjinore. Vajzat tejkaluan djemtë në të tri fushat, me diferencat më të spikatura në lexim, ku hendeku arriti 36 pikë. Vetëm 21 për qind e nxënësve arritën nivelin bazë të aftësive në shkencë, 15 për qind në matematikë dhe 16 për qind në lexim.

Vijueshmëria mbetet gjithashtu shqetësuese, pasi mbi gjysma e nxënësve raportuan mungesa gjatë dy javëve para testit. Raporti rekomandon forcimin e kompetencave bazë, zhvillimin e mendimit kritik dhe bashkëpunimin më të ngushtë ndërmjet shkollave dhe familjeve.

Foto: javier trueba / Unsplash