Banka e Shqipërisë dhe Banka Evropiane për Rindërtim dhe Zhvillim (BERZH) dhanë sot startin zyrtar të nismës “WE Finance Code Albania”, një kod kombëtar që synon të përmirësojë aksesin në financim për ndërmarrjet mikro, të vogla dhe të mesme të drejtuara ose në pronësi të grave sipërmarrëse.

Guvernatori Gent Sejko e cilësoi këtë nismë si një angazhim të rëndësishëm të mbështetur në të dhëna dhe bashkëpunim institucional. Banka e Shqipërisë ka marrë rolin e koordinatores kombëtare, duke ndërtuar një ekosistem të përbashkët midis institucioneve publike dhe financiare, me qëllim krijimin e një tregu financimi më gjithëpërfshirës.

Një nga rezultatet konkrete të kësaj nisme është paneli analitik kombëtar i financimit të MSME-ve, i cili do të jetë i aksesueshëm për publikun në faqen zyrtare të bankës. Ky instrument integron të dhëna mbi kreditë dhe depozitat me karakteristikat e bizneseve, duke përfshirë gjininë e pronarëve, madhësinë, sektorin dhe rajonin gjeografik.

Ceremonia u pasua nga një panel diskutimi ku morën pjesë drejtues të sektorit bankar dhe institucione publike, të cilët trajtuan rëndësinë e bashkëpunimit ndërinstitucional për zhvillimin e produkteve financiare dhe politikave mbështetëse për sipërmarrjen e grave në Shqipëri.

Foto: LinkedIn Sales Solutions / Unsplash