Ambasada Amerikane në Tiranë ka bërë me dije se Departamenti i Shtetit, nën drejtimin e Presidentit Donald Trump, ka nisur zbatimin e masave të ashpra ndaj shtetasve të huaj që vlerësohen si kërcënim për sigurinë e Shteteve të Bashkuara.

Sipas njoftimit të publikuar në rrjetet sociale, autoritetet amerikane kanë vendosur të anulojnë vizat e individëve të huaj të përfshirë në aktivitete kriminale, të atyre që nxisin dhunë ndaj qytetarëve amerikanë, si dhe të personave që rrezikojnë sigurinë kombëtare të vendit.

Ky qëndrim pasqyron politikën e re të administratës Trump, e cila ka bërë të qartë se nuk do të tolerohet asnjë sjellje e tillë nga ana e shtetasve të huaj që ndodhen në territorin amerikan ose që kërkojnë akses në të. Ambasada theksoi se ky vendim vlen për çdo shtetar të huaj, pavarësisht origjinës, i cili vepron në kundërshtim me ligjet dhe interesat e Shteteve të Bashkuara. Masa synon të forcojë mbrojtjen e qytetarëve amerikanë dhe të garantojë rendin e sigurinë brenda vendit.

Foto: DAVIDCOHEN / Unsplash